Il-Patt tas-Sindki għall-Klima u l-Enerġija huwa miftuħ għall-awtoritajiet lokali kostitwiti demokratikament ma'/minn rappreżentati eletti, ikun x'ikun id-daqs tagħhom u jkun x'ikun l-istadju ta' implimentazzjoni tal-politiki dwar l-enerġija u l-klima tagħhom.

Awtoritajiet ġirien ta' daqs żgħir u medju jistgħu wkoll, taħt ċerti kondizzjonijiet, jiddeċiedu li jingħaqdu bħala grupp ta' firmatarji.

L-impenji tal-firmatarji tal-Patt huma marbuta mal-qafas ta' politika tal-UE għall-klima u l-enerġija: il-pakkett tal-2020 għall-klima u l-enerġija għall-firmatarji li ngħaqdu bejn l-2008 u l-2015 u l-qafas dwar il-klima u l-enerġija 2030 kif ukoll l-Istrateġija tal-UE dwar l-Adattament għat-Tibdil fil-Klima għall-firmatarji wara l-2015.

Il-firmatarji tal-Patt jikkommettu ruħhom li jadottaw approċċ integrat għall-mitigazzjoni u adattament għat-tibdil fil-klima. Huma meħtieġa li jiżviluppaw, fl-ewwel sentejn tal-adeżjoni, Pjan ta' Azzjoni għall-Enerġija Sostenibbli u l-Klima bil-għanijiet li jnaqqsu l-emissjonijiet tas-CO2 b'tal-anqas 40% sal-2030 u biż-żieda ta' reżiljenza għat-tibdil fil-klima.